Мінская і Сагдыйская вобласці: новы імпульс супрацоўніцтву

23 красавіка 2026 года ў Мінску адбыліся прэзентацыя і двухбаковыя перамовы з удзелам дэлегацыі Сагдыйскай вобласці Рэспублікі Таджыкістан.

Мінскае аддзяленне Беларускай гандлёва-прамысловай палаты выступіла арганізатарам дзелавой сустрэчы. Мерапрыемства адкрыў генеральны дырэктар Мінскага аддзялення БелГПП Сяргей Набешка, які прывітаў удзельнікаў і адзначыў высокую цікавасць беларускага бізнесу да супрацоўніцтва з Сагдыйскай вобласцю. Далей слова далі афіцыйным асобам.

Мерапрыемства прайшло ў гасцініцы «Прэзідэнт-Гатэль» і аб'яднала больш за 100 кампаній і арганізацый дзвюх краін.

У складзе таджыкскай дэлегацыі, якую ўзначаліў намеснік старшыні Сагдыйскай вобласці спадар Анвар Яъкуби, у Мінск прыбылі кіраўнікі 32 прадпрыемстваў. Сярод іх – буйныя вытворцы напояў і прадуктаў харчавання («БАРС», «Сірдарэ», «Субхі ватан», «Файзі Расул»), металургічныя і горназдабыўныя кампаніі («Норд Азія метал», ГУП «Фон Ягноб», «Кудрат-2010»), тэкстыльныя і швейныя прадпрыемствы («Арганік Ян», «Гулістоні муосір», «Лідар»), а таксама кампаніі-забудоўшчыкі, вытворцы дзіцячых тавараў, дываноў і будаўнічых матэрыялаў.

З беларускага боку ўдзел прынялі намеснік старшыні Мінскага абласнога выканаўчага камітэта, кіраўнікі профільных арганізацый і прадпрыемстваў-экспарцёраў, зацікаўленых у развіцці кааперацыі і пастаўках у Таджыкістан.

У рамках прэзентацыі да прадстаўнікоў таджыкскага бізнесу звярнуўся намеснік старшыні Мінскага аблвыканкама Дзяніс Курленка, у сваім выступленні ён падкрэсліў высокі патэнцыял узаемавыгаднага супрацоўніцтва – ад паставак беларускай тэхнікі і фармацэўтыкі да сумесных праектаў у АПК. Спадар Анвар Яъкубі адзначыў дынамічны рост эканомікі Согда і запрасіў беларускіх партнёраў да ўдзелу ў індустрыяльных і турыстычных праектах рэгіёна.

Затым таджыкскім калегам былі прадстаўлены прэзентацыі: 1. Беларусь − краіна для доўгатэрміновага партнёрства. Эканамічны і інвестыцыйны патэнцыял; 2. Турыстычны патэнцыял Рэспублікі Беларусь; 3. Лячэнне ў найбуйнейшай клініцы Мінскай вобласці.

Пасля пленарнай часткі адбыліся прамыя двухбаковыя сустрэчы беларускіх і таджыкскіх прадпрымальнікаў. Удзельнікі абмеркавалі пастаўкі прадуктаў харчавання (сокі, алей, кансервы, мясная прадукцыя), кааперацыю ў будаўніцтве (металавырабы, крапеж, цеплаізаляцыя), супрацоўніцтва ў тэкстыльнай галіне, а таксама лагістыку.